"Kur Evropa është e bashkuar, e fortë dhe reagon shpejt, gjërat kthehen në normalitet dhe qetësi"! Kështu u shpreh presidenti i Francës, Emmanuel Macron, teksa udhëheqësit e shteteve anëtare të Bashkimit Evropian u mblodhën mbrëmjen e 22 janarit në Bruksel për një samit urgjent, i thirrur pas kërcënimeve të presidentit amerikan, Donald Trump, për vendosjen e tarifave ndaj disa shteteve të kontinentit evropian. Presidenti Macron kërkoi megjithatë që Evropa “të qëndrojë vigjilente dhe të vazhdojë të veprojë në mënyrë të bashkuar”. Samiti i BE-së u mbajt edhe pse presidenti amerikan më 21 janar hoqi dorë nga vendosja e tarifave, pasi në Davos të Zvicrës u arrit një pajtim për kornizën e marrëveshjes për Groenlandën, gjatë një takimi me sekretarin e Përgjithshëm të NATO-s, Mark Rutte. Kryeministrja e Danimarkës, Mette Federiksen, para samitit tha për gazetarët se sovraniteti i shtetit të saj dhe Groenlandës janë “vija të kuqe”. “E kemi bërë të qartë që në fillim se nuk është për diskutim sovraniteti ynë shtetëror dhe kjo nuk do të ndryshojë. Ne veçse kemi bashkëpunuar me SHBA-në, siç kemi bërë gjithmonë kur vjen puna për sigurinë. Megjithatë, vijat tona të kuqe janë të qarta. Rregullat tona demokratike nuk janë për negocim”, u shpreh ajo. Ndërkaq, kancelari gjerman, Olaf Scholz, shprehu lehtësim me tërheqjen e Trumpit nga tarifat, ndërsa shtoi se Bashkimi Evropian duhet të forcohet. “BE-ja, pjesa evropiane e NATO-s, duhet të jetë në gjendje ta mbrojë veten”, u shpreh ai. Bashkimi Evropian në këtë samit kishte planifikuar fillimisht të diskutojë për një përgjigje të përbashkët ndaj kërcënimeve amerikane për tarifa. Pritet që udhëheqësit evropianë të bisedojnë edhe për strategjinë e përgjigjes ndaj kërcënimeve të mundshme në të ardhmen nga presidenti Trump.