Delegacioni i Bashkimit Evropian në Shqipëri lançon një projekt të ri në vendin tonë, në vlerën e rreth 1.5 milionë eurove, që ka në fokus mjedisin. Projekti EUGreenGen synon të rrisë ndërgjegjësimin rreth çështjeve mjedisore, si ekonomia, biodiversiteti dhe menaxhimi i mbetjeve, dhe sipas Delegacionit të BE, do të nxisë rrugëtimin e Shqipërisë drejt unionit. Kryetari i Bashkëpunimit në Delegacionin e BE në Shqipëri, Hubert Perr, theksoi rëndësinë e madhe të këtij projekti në procesin e integrimit. "Procesi i anëtarësimit në BE nuk ka të bëjë vetëm me miratimin e ligjeve - ai nxit transformim të vërtetë shoqëror. Legjislacioni mjedisor është një nga fushat më komplekse dhe të kushtueshme të integrimit në BE, megjithatë sjell përfitime të mëdha afatgjata, të cilat jo vetëm që janë jetësore për mjedisin dhe shëndetin e qytetarëve, por gjithashtu krijojnë mundësi investimi, vende të reja pune dhe turizëm e rritje të qëndrueshme”. Sipas Delegacionit të BE në Tiranë, projekti do të zbatohet përgjatë tre viteve të ardhshme dhe ofron mbështetje për ta çuar Shqipërinë drejt një ekonomie të gjelbër të qëndrueshme dhe gjithëpërfshirëse, ne përputhje me procesin e pranimit në Bashkimin Evropian.