Bashkimi Europian e përshëndeti si hap pozitiv drejt normalizimit të marrëdhënieve dypalëshe vendimin e Serbisë për të lejuar qarkullimin e lirë të mjeteve më targa të Kosovës, RKS në territorin e saj. Zëdhënësi i bllokut, Peter Stano, e bëri të qartë se tashmë, Brukseli pret që edhe Prishtina zyrtare të hedhë një hap të ngjashëm. “Ne e përshëndesim vendimin e Serbisë që të njohë zyrtarisht targat e automjeteve RKS, të lëshuara nga Kosova. Ky vendim është hap pozitiv në zbatimin e Marrëveshjes në rrugën drejt normalizimit, por edhe zotimeve të mëparshme në kuadër të dialogut që lirinë e lëvizjes. Kjo dëshmon se përparimi në procesin e normalizimit të raporteve mes Kosovës dhe Serbisë është i mundur. Po ashtu është një hap i duhur drejt integrimit më të mirë europian të Ballkanit Perëndimor, që në fund përfitues do të jenë qytetarët e rajonit. Ky vendim hap rrugën për heqjen e plotë të regjimit të letrave ngjitëse në target e automjeteve. BE-ja tani pret që Kosova të përgjigjet në mënyrë të ngjashme”, tha Stano përmes një përgjigje me shkrim. Ishte shefi i Zyrës për Kosovën në Qeverinë serbe, Petar Petkovic ai që njoftoi një ditë më parë lajmin se nga 1 janari i vitit 2024, automjeteve me targa RKS do t’i mundësohet lëvizja e lirë në territorin e Serbisë. Ai nuk specifikoi megjithatë nëse targat e veturave do të mbulohen me letra ngjitëse kur të kalojnë kufirin, praktikë kjo që vazhdon të zbatohet.