Pasojat e rënda të sulmeve kanë lënë në një gjendje të tmerrshme banorët e Gazës, të cilët përpos rëndesës së fortë të sulmeve po përballen me mungesë të elementëve jetikë si uji, ushqimet dhe ilaçet, si pasojë e rrethimit që Izraeli ka bërë në shenjë hakmarrjeje. Varfëria ekstreme po vijon t’i ndjekë këmba këmbës edhe në këto ditë edhe më të vështira, që nisën fill pas sulmeve në territoret izraelite nga militantët e Hamasit. Ajo që e ka bërë situatën më të papërballueshme është tërheqja e disa vendeve nga vijimi i ofrimit të ndihmave për Plestinën, duke qëndruar kështu në krah të Izraelit për situatën e sulmeve. Duke parë gjendjen e vështirë në Rripin e Gazës, Organizata e Kombeve të Bashkuara dhe Unioni Europian kanë ndryshuar këndvështrimin e tyre për situatën në Palestinë, duke vendosur të qëndrojnë pranë popullit që po vuan. OKB-ja njoftoi se rrethimi i vendit nga Izraeli, përfshirë ndërprerjen e ujit, ushqimeve dhe nevojave të tjera jetike, bie ndesh me ligjin ndërkombëtar. Pamjet: AFP