Udhëheqësit e Bashkimit Evropian i dhanë detyrë të enjten Komisionit Evropian të shqyrtojë opsionet për mbështetjen financiare të Ukrainës për dy vitet e ardhshme, duke lënë të hapur mundësinë e një kredie gjigante që mund të përdorë asetet e ngrira ruse. Pas samitit maratonë në Bruksel, udhëheqësit e BE-së nuk dhanë dritën jeshile për projektin e “kredisë së dëmshpërblimeve” prej 140 miliardë eurosh, duke e shtyrë këtë vendim për dhjetor. Megjithatë, diplomatët e përshkruan rezultatin si një hap drejt një marrëveshjeje të mundshme, pavarësisht kundërshtimeve të Belgjikës, ku ruhen pjesa më e madhe e fondeve të bankës qendrore ruse të ngrira pas pushtimit të Ukrainës. Presidenti ukrainas, Volodymyr Zelensky, i pranishëm në Bruksel për të siguruar mbështetjen evropiane, e konsideroi rezultatin si një sinjal të fortë politik për përdorimin e aseteve ruse për të mbajtur Kievin në luftë. Shumica e fondeve ruse ruhen në Euroclear, me seli në Belgjikë, e cila ka shfaqur shqetësime ligjore lidhur me planin. Kryeministri belg, Bart De Wever, kërkoi garanci se do të ndajnë riskun nëse Rusia ngre padi. Në të njëjtën linjë, presidenti francez Emmanuel Macron pranoi se plani ngre çështje ligjore, por mbetet opsioni më i mirë për të mbështetur Ukrainën. Samiti i BE-së u zhvillua një ditë pas miratimit të paketës së 19-të të sanksioneve ndaj Rusisë. Shtetet anëtare vendosën ndalim njëvjeçar për importin e gazit natyror të lëngshëm nga Rusia dhe futën në listën e zezë më shumë se 100 cisterna të flotës ruse të naftës. Paralelisht, SHBA-ja vendosi sanksione ndaj dy kompanive të mëdha të naftës ruse, Rosneft dhe Lukoil, një veprim që Zelensky e përshëndeti si mesazh të fuqishëm ndaj Moskës.