Shefja e politikës së jashtme të Bashkimit Evropian, Kaja Kallas, ka deklaruar se kërcënimet nga Irani mund të bëhen “më të rrezikshme” nëse ekspertët bërthamorë nuk përfshihen në negociatat e paqes. Deklarata u bë gjatë një takimi të liderëve të BE-së në Qipro, në një moment tensionesh të larta në Lindjen e Mesme. Kallas paralajmëroi se ekziston mundësia që çdo marrëveshje e re të jetë më e dobët se marrëveshja bërthamore e vitit 2015, nga e cila SHBA u tërhoq gjatë mandatit të parë të Donald Trump. Sipas saj, përjashtimi i ekspertëve bërthamorë nga tryeza e negociatave do të dobësonte rezultatin e çdo marrëveshjeje të ardhshme. Irani kishte pranuar të kufizonte aktivitetet e tij bërthamore dhe të lejonte inspektime ndërkombëtare, në këmbim të heqjes së sanksioneve ekonomike. Kallas theksoi gjithashtu se një marrëveshje që fokusohet vetëm te programi bërthamor nuk është e mjaftueshme. Sipas saj, duhet të adresohen edhe programet e raketave, mbështetja për grupe të armatosura në rajon, si dhe aktivitetet kibernetike dhe hibride në Evropë. “Nëse këto nuk trajtohen, do të përfundojmë me një Iran më të rrezikshëm,” tha ajo.