Bashkimi Evropian dhe NATO paralajmëruan se Rusia po bëhet gjithnjë e më e pamatur dhe u zotuan të reagojnë ndaj atij, që ata e quajtën një “normalitet i ri”, pas sulmit të dështuar rus në aeroportin gjerman të Lepzigut. "Leipzig shënon një përshkallëzim të ri në tokën e Bashkimit Evropian, që i atribuohet drejtpërdrejt Rusisë", tha Presidentja e Komisionit Evropian, Ursula von der Leyen, duke shtuar se "Ne duhet të ndërmarrim hapa dhe kjo do të thotë të jemi të gatshëm t'i përgjigjemi pamaturisë së Rusisë më shpejt dhe më mirë". I njëjtë ishte dhe qëndrimi i Sekretarit të Përgjithshëm të NATO-s, Mark Rutte, i cili theksoi se e gjithë aleanca, përfshirë dhe SHBA-në, qëndron "në solidaritet të plotë me Gjermaninë". Gjithashtu, kryediplomatja e BE-së, Kaja Kallas, foli për një "reagim të fortë" të unionit. “Gjermania ka bërë shumë, tha ajo, tani duhet të diskutojmë se çfarë mund të bëhet së bashku kundër Rusisë”. Edhe ministrat e Jashtëm të Bashkimit Evropian, në një takim urgjent në Irlandë, dolën me qëndrimin e përbashkët në mbështetje të Gjermanisë, ndërsa shprehën qartë edhe mbështetjen për Ukrainën. Në takimin e ministrave u fol për një përgjigje ndaj incidenteve të shumta me dronë të muajve të fundit. “Po shqyrtohet mundësia e përfshirjes së 1.600 rusëve, kompanive dhe organizatave të tjera në listën e sanksioneve”, thanë ministrat. Edhe Franca dhe Spanja folën për solidaritet me Gjermaninë, megjithatë ministri i Jashtëm i Spanjës kujtoi se Europa ka disa kufij, një thumbim i lehtë ky, pasi Spanja ndihet e braktisur nga partnerët evropianë në krizën e Theutës.