Komisionerja për Zgjerim e Bashkimit Evropian, Marta Kos, komentoi zhvillimet e fundit në Shqipëri, ku vendi është përfshirë nga protestat kundër projektit në Zvërnec. Në një konferencë për shtyp, Komisionerja Kos tha se Komisioni Evropian ka marrë garanci nga Shqipëria se do të përmbushë standardet mjedisore të unionit. Kos vlerësoi përparimin e Shqipërisë në procesin integrues, teksa u pyet nëse projekti luksoz mbi 1.4 miliardë euro, i lidhur me një kompani investimi ku është përfshirë Jared Kushner, dhëndri i Presidentit Donald Trump, mund të ndikojë në procesin e anëtarësimit. “Shqipëria është një nga vendet kryesuese në procesin e zgjerimit dhe ka bërë përparim të rëndësishëm në mbrojtjen e mjedisit. Ky përparim është i vlefshëm, i njohur dhe duhet të mbrohet. Në një situatë si kjo, është e rëndësishme që të gjithë të veprojmë mbi bazën e fakteve. Komisioni Evropian është në kontakt të vazhdueshëm me autoritetet shqiptare, jo vetëm me kryeministrin Edi Rama. Kemi marrë garanci nga qeveria shqiptare se do të kryhet një vlerësim i plotë i ndikimit në mjedis dhe se standardet evropiane të mbrojtjes së mjedisit do të respektohen”. Projektet në zonat e mbrojtura kanë shkaktuar protesta në vend, që vijojnë prej dy javësh. Komisionerja Kos theksoi se e drejta e protestës është një liri themelore në BE dhe në vendet kandidate, ndërsa procesi i anëtarësimit mbetet i bazuar në monitorim të vazhdueshëm dhe respektim të rregullave evropiane. “Sa i përket protestave, dua të shtoj se e dini sa i rëndësishëm është për ne e drejta për të protestuar. Ajo është një e drejtë themelore në Bashkimin Evropian dhe për të gjitha vendet aspirante. Jam e lumtur të shoh që kjo e drejtë respektohet në Shqipëri”. Komisionerja Marta Kos tha se, si në rastin e Pishë-Poros dhe Nartës, ashtu edhe për të gjitha projektet e tjera në zhillim në Shqipëri, për Bashkimin Evropian me rëndësi është përputhja e tyre me kuadrin ligjor.