Komisioni Evropian ka konfirmuar se ka siguruar mbështetjen e nevojshme për të vendosur kundërmasa tregtare me tarifa 25% ndaj SHBA-së, duke u hakmarrë për tarifat e saj të çelikut dhe aluminit. Në deklaratën e komisionit thuhet se “BE-ja i konsideron tarifat amerikane të pajustifikuara dhe të dëmshme, duke shkaktuar dëm ekonomik për të dyja palët, si dhe ekonominë globale”. “BE-ja ka shprehur preferencën e saj të qartë për të gjetur rezultate të negociuara me SHBA-në, të cilat do të ishin të balancuara dhe reciprokisht të dobishme”, thuhet më tej në deklaratë. Por shton se kundërmasat do të hyjnë në fuqi, pasi të kenë përfunduar kontrollet përfundimtare, me detyrimet që do të mblidhen nga e marta, 15 prill. “Këto kundërmasa mund të pezullohen në çdo kohë, nëse SHBA-ja bie dakord për një rezultat të drejtë dhe të balancuar të negociuar,” thuhet në deklaratë. Kryeministrja italiane Xhorxha Meloni ka njoftuar se do të udhëtojë së shpejti në SHBA për të negociuar me Trump dhe kjo nuk i ka pëlqyer presidentit francez, Emmanuel Macron, i cili e ka cilësuar si një thyerje të unitetit të Europës. Ndërkaq, për herë të parë Rusia, Klina dhe Europa janë bërë bashkë pas shumë kohësh në qëndrimet e tyre dhe e gjitha kjo lidhet me tarifat e vendosura nga presidenti amerikan Donald Trump. Putin ka akuzuar SHBA-në për shkelje të rregullave të tregtisë ndërkombëtare pasi hynë në fuqi tarifat 104% për importet nga Kina. “Uashingtoni nuk duket se është i detyruar nga normat e ligjit të tregtisë ndërkombëtare,” ka njoftuar ministria e jashtme ruse duke shtuar se vendimet tarifore të marra nga Trump “shkelin rregullin themelor të OBT-së”.