Kryeministri britanik, Keir Starmer, foli pas takimit urgjent me liderët evropianë në Paris për çështjen e Ukrainës. Ai tha se nuk është në dilemë vetëm e ardhmja e Ukrainës, por është çështje ekzistenciale për Evropën në tërësi. “Ne duhet të njohim epokën e re në të cilën jemi dhe është koha që ne të marrim përgjegjësinë për sigurinë tonë, për kontinentin tonë”, ka deklaruar Starmer. Po ashtu, edhe Kancelari gjerman, Olaf Scholz bëri thirrje të hënën për unitet mes Evropës dhe Shteteve të Bashkuara sa i përket përgjegjësisë dhe garantimit të sigurisë për Ukrainën. “Nuk duhet të ketë ndasi për sigurinë dhe përgjegjësinë në mes të Evropës dhe SHBA-së”, ka thënë Scholz për gazetarët. “Me fjalë tjera, NATO-ja funksionon mbi faktin se ne veprojmë gjithmonë së bashku dhe ndajmë rrezikun, dhe kështu edhe garantojmë siguri. Kjo nuk duhet të vihet në pikëpyetje”, ka thënë mes tjerash Scholz. Në nisje të samitit, kryeministri britanik, Keir Starmer deklaroi gjithashtu se është i gatshëm të dërgojë forca paqeruajtëse në Ukrainë, nëse është e nevojshme, ide që u mbështet edhe nga presidenti i Francës, Emmanuel Macron. Por kancelari Scholz ka thënë se është krejtësisht kundër dërgimit të ushtarëve në Ukrainë pa përfshirjen amerikane. Presidenti amerikan, Donald Trump e ka tronditur Ukrainën dhe aleatët evropianë javën e kaluar, kur ka bërë të ditur se ka biseduar me presidentin rus, Vladimir Putin, për të diskutuar përfundimin e luftës në Ukrainën. Zyrtarë të lartë amerikanë dhe rusë do të takohen të martën në Arabinë Saudite, ndërsa Zelensky ka paralajmëruar se çdo marrëveshje që do të njihet pa praninë e Ukrainës në bisedime, nuk do të njihet nga Ukraina.