Nëse marrëveshja me SHBA-në nuk arrihet, Bashkimi Europian e ka gati shpagimin për SHBA-në: Sipas ministrit të jashtëm italian, Antonio Tajani, Brukseli ka përgatitur tashmë një listë tarifash me vlerë 21 miliardë euro për produktet amerikane nëse përpjekjet për vulosjen e një ujdie, dështojnë. Presidenti amerikan Donald Trump ka kërcënuar të vendosë tarifa prej 30% për importet nga Meksika dhe BE-ja nga 1 gushti, pasi javë të tëra negociatash me partnerët kryesorë tregtarë të SHBA-së nuk arritën të shtronin rrugën e një marrëveshje gjithëpërfshirëse.Tajani tha për gazetën Il Messaggero se, për të ndihmuar ekonominë e eurozonës, Banka Qendrore Evropiane duhet të marrë në konsideratë një program të ri “lehtësimi sasior” me blerje obligacionesh dhe ulje të mëtejshme të normave të interesit.“Tarifat i dëmtojnë të gjithë, duke filluar nga Shtetet e Bashkuara”, tha Tajani.“Nëse tregjet e aksioneve bien, një gjë e tillë do t’i vinte në rrezik pensionet dhe kursimet e amerikanëve”, shtoi ai.Sipas kryediplomatit italian, qëllimi duhet të jetë “zero tarifa” dhe një treg i hapur mes Kanadasë, Shteteve të Bashkuara, Meksikës dhe Evropës.Kancelari gjerman, Friedrich Merz, tha një ditë më parë se do të punojë në mënyrë intensive me presidentin francez, Emmanuel Macron, dhe presidenten e Komisionit Evropian, Ursula von der Leyen, për të zgjidhur konfliktin tregtar me Shtetet e Bashkuara.