Udhëheqësit e Bashkimit Evropian kanë arritur marrëveshje për t’i dhënë Ukrainës një hua prej 90 miliardë eurosh, pasi nuk arritën të bien dakord për përdorimin e aseteve të ngrira ruse. Marrëveshja, e cila udhëheqësit thanë se do t’i shërbente nevojave ekonomike dhe ushtarake të Ukrainës për dy vjet, erdhi pas më shumë se dy ditësh bisedimesh në Bruksel. Presidenti ukrainas, Volodymyr Zelensky, ka kërkuar nga BE-ja që t’i përdor 210 miliardë euro nga asetet e ngrira ruse, por Belgjika ka kundërshtuar. Presidenti francez, Emmanuel Macron, deklaroi se beson se do të ishte “e dobishme” për Evropën të riangazhohej nw negociata me presidentin rus, Vladimir Putin. Zelensky reagoi duke njoftuar se delegacionet ukrainase dhe amerikane do të takohen për bisedime të reja të premten dhe të shtunën në SHBA. Nga ana tjetër, Sekretari Amerikan i Shtetit, Marco Rubio, tha se shpreson që një marrëveshje paqeje midis Rusisë dhe Ukrainës të arrihet deri në fund të vitit. "Shpresoj që të arrihet këtë muaj, para fundit të vitit. Shpresoj që të finalizohet sa më shpejt të jetë e mundur", u tha Rubio gazetarëve në Departamentin e Shtetit në Uashington.