Teksa kostot e energjisë në Europë po shkojnë në qiell, Rusia, thotë BBC, po djeg sasi të mëdha gazi natyror, i cili më parë, do të ishte eksportuar në Gjermani. Ekspertët pohuan për gjigandin mediatik se uzina në afërsi të kufirit me Finlandën, po djeg gaz me vlerë rreth 10 milionë dollarë çdo ditë. Shkencëtarët janë të shqetësuar nga vëllimet e mëdha të dioksidit të karbonit dhe blozës që po lëshohen, të cilat mund të përkeqësojnë shkrirjen e akullit në Arktik. Analiza e Rstad Energy tregon se rreth 4.34 milionë metra kub gaz digjen çdo ditë. Ky gaz vjen nga një fabrikë e re në Portovaya, në veri-perëndim të Shën Petersburgut. Shenjat e para se diçka nuk ishte në rregull u diktuan nga vetë qytetarët finlandezë në zonën kufitare, të cilët vunë re flakë të mëdha në horizont në fillim të verës. Portovaya ndodhet pranë një stacioni kompresori në fillim të tubacionit Nordstream 1, i cili transporton gaz nën det në Gjermani. Furnizimet përmes tubacionit janë kufizuar që nga mesi i korrikut, me rusët që nxjerrin si pretekst problemet teknike. Që nga qershori megjithatë, studiuesit kanë vënë re një rritje të konsiderueshme të nxehtësisë që buron nga objekti - që mendohet të jetë pikërisht nga djegia e gazit natyror. Një pjesë e tyre mendojnë se djegia nuk është aksidentale, por një vendim i qëllimshëm i marrë për arsye operacionale. Të tjerë nuk përjashtojne mundësinë e sfidave teknike në trajtimin e vëllimeve të mëdha të gazit që do të furnizonin tubacionin Nordstream.