Banka Botërore ka ulur pritshmëritë për rritjen ekonomike të Shqipërisë për vitin 2021. Në raportin e fundit të perspektivës ekonomike globale, institucioni financiar ndërkombëtar është treguar më konservator duke parashikuar një rritje ekonomike prej 4.4% për këtë vit, nga 5.1% që parashikonte në fillim të janarit. Me ulje prej 0.7% është rishikuar edhe vlerësimi për vitin e ardhshëm nga banka botërore, e cila prêt që ekonomia e vendit të rritet me 3.7%, teksa për vitin që lamë pas vlerësimet përfundimtare të saj flasin për një rënie ekonomike prej -3.3%, shumë poshtë vlerësimit fillestar të saj tejet pesimist prej -7.5%. Ekonomia shqiptare dhe ajo e Malit të Zi në rajon vlerëson raporti do të vazhdojnë të ndjejnë goditjen e pandemisë për shkak të varësisë së tyre të lartë nga turizmi, pasi masat kufizuese mund të pengojnë edhe në vijim ardhjen e turistëve të huaj dhe zhvillimin e sektorit me peshë të konsiderueshme në ekonominë e dy vendeve. Në periudhën afatmesme thuhet në raport, ekonomitë e Shqipërisë dhe Maqedonisë së Veriut do të nxiten nga përshpejtimi i reformave strukturore të ndërmarra në kuadër të anëtarësimit në Bashkimin Europian në rast se procesi nuk shtyhet më tej në kohë. Ndër vendet e rajonit, këtë vit rritjen më të madhe ekonomike sipas Bankës Botërore pritet ta ketë Mali i Zi prej 7.1%, pas goditjes së madhe që mori vitin e kaluar me rënien më të thellë në Ballkanin Perëndimor, ndjekur nga Serbia me 5%. Vlerësimet e Bankës Botërore për ecurinë e ekonomisë shqiptare janë ndjeshëm më të ulëta se pritshmërinë optimiste të qeverisë dhe Bankës së Shqipërisë që parashikojnë përkatësisht një rritje ekonomike në 5.5% dhe 5.3% për këtë vit.