Dhjetë muaj pas tragjedisë detare që tronditi ujërat e Sicilisë, jahti luksoz “Bayesian” është nxjerrë më në fund në sipërfaqe. Pas një operacioni të gjatë dhe teknikisht kompleks, i udhëhequr nga një kompani britanike, anija u ngrit nga një thellësi prej 49 metrash në ujërat pranë Portiçelos, ku ishte fundosur më 19 gusht 2024. Operacioni i rikuperimit, i mbështetur nga vinçat gjigantë është zhvilluar gjatë tri ditëve të fundit, duke e ngritur trupin e anijes në një pozicion vertikal. Kjo ka lejuar për herë të parë qasje në anën e djathtë të saj, e cila deri më tani kishte qenë e mbështetur drejtpërdrejt mbi shtratin detar dhe e paarritshme për ekipet teknike. Sipas njoftimit të Autoritetit Portual, operacionet përfundimtare për rikuperimin total të anijes do të zhvillohen të shtunën, duke nisur që në agim. Në këtë fazë do të kryhet zbrazja e plotë e rrënojave dhe përgatitja për transportin drejt portit. Ndërkohë, hetimet për shkaqet e mbytjes së anijes vijojnë. Një raport paraprak britanik zbuloi se marinari në roje, në momentin kritik, kishte preferuar të postonte një video në rrjetet sociale në vend që të ngrinte alarmin për ndihmë. Fundosja e “Bayesian” në brigjet e Porticello, pranë Palermos, shkaktoi vdekjen e 7 personave. Midis tyre ishin miliarderi britanik Mike Lynch dhe vajza e tij Hannah, së bashku me pasagjerë të tjerë.