Policia e Kosovës me urdhër të Prokurorisë Themelore të Prishtinës ka zhvilluar një bastisje pranë objektit të Policisë Rajonale të Prishtinës. Sipas dyshimeve, bëhet fjalë për shërbime të kundërligjshme mjekësore. “Prokuroria Themelore në Prishtinë, njofton opinionin publik se nën udhëheqjen e Prokurorit të Shtetit në koordinim me Policinë e Kosovës, Drejtorinë për Hetime Rajonale në Prishtinë, është duke u realizuar bastisje në një objekt në qendër të Prishtinës, ku dyshohet se janë duke u ofruar shërbime të kundërligjshme mjekësore në këtë objekt”, njofton Prokuroria. Ndërkohë, ministri i Punëve të Brendshme, Xhelal Sveçla thotë se veprimtaria e tyre paraqet rrezik për sigurinë e shtetit. “Kemi njoftuar institucionet përkatëse të sigurisë dhe është konfirmuar se e njëjta ka veprimtari ilegale gjë e cila është vërtetuar pas hyrjes së Policisë dhe Prokurorisë brenda objektit. Një veprimtari e tillë në mes të tre institucioneve më të larta të sigurisë së Kosovës, Ministrisë së Punëve të Brendshme, Kryeprokurorisë dhe Policisë së Kosovës është tejet e dyshimtë dhe paraqet rrezik për sigurinë e vendit”, ka thënë Sveçla. Ministri ka njoftuar se bëhet fjalë për organizatën joqeveritare “Qendra për paqe dhe tolerancë Prishtina” që nuk ka respektuar legjislacionin e Kosovës për funksionimin e saj. Mësohet se kjo organizatë jepte shërbime shëndetësore për qytetarët e komunitetit serb.