Komisioni Qendror i Zgjedhjeve u ri-formatua para zgjedhjeve me marrëveshje mes dy partive te mëdha. Por, Lulzim Basha nuk beson në integritetin e të zgjedhurve të tij në KAS. Kryedemokrati akuzoi gjykatën e KQZ-se per vendime politike. “Shikoni marifetet që përdorin! Refuzojnë t’ju kërkojnë organeve shtetërore provat e manipulimit. Është i njëjti KAS sot, ai që ishte dje dhe pardje. Ishte KAS-i që hoqi emrat e kandidatëve nga fleta e votimit siç urdhëroi Edi Rama, i njëjti KAS që votoi për të mos i kërkuar prova institucioneve shtetërore. Refuzojnë të sjellin informacionet apo të shërbimit informativ ku ka orë të tëra përgjimesh të ministrave të Ramës, duke shkelur ligjin, që do të mjaftonin për t’ju vënë prangat dhe për t’i çuar tani si të pandehur para drejtësisë”, u shpreh Basha. Demokratët pritet të ndjekin të gjitha hallkat e ankimit per ndryshimi ne rezultatit te zgjedhjeve. Pas shterimit të rrugëve ligjore, nuk përjashtojnë as protestat. “Por detyra jonë është të konsumojmë çdo hap dhe betejën ta shtrijmë në çdo fushë, ta shtrijmë në çdo rrugë, në çdo qytet e në çdo fshat. Në të gjitha format, në të gjitha mënyrat, në çdo fushë beteje Një gjë është e sigurt si drita e diellit sot fundi i kësaj beteje nuk mund të jetë triumfi i regjimit Rama-Doshi, por përmbysja e këtij regjimi dhe fitorja e Shqipërisë dhe e shqiptarëve”, tha Basha. Nuk pranon humbjen ndaj nuk njeh as rezultatin e zgjedhjeve. Ftesave për bashkëpunim me Edi Ramën i mbyll derën, por më i ashpër tregohet me ish-themeluesin e partisë Arben Imami i cili thotë se marrëveshja Rama-Basha vijon. “Opsioni për të bashkëpunuar me këtë krim që u krye faqe gjithë shqiptarëve dhe botës, janë zero. Kush nuk e ka dëgjuar, le ta dëgjojë. Kush nuk e ka kuptuar dhe vijon flet per bashkepunim do te thote se eshte cirak i Rames”, tha Basha. Lulzim Basha paralajmëroi edhe demokratët e Fierit të përgatiten shume shpejt për zgjedhje ne parti duke mos dhënë më shume detaje mbi procesin.