Zgjati vetëm disa orë zhgënjimi i Zegjine Caushit për humbjen e mandatit pas rinumërimit të votave në Qarkun e Fierit. Kandidatja e PS, Maldrita Bardho, e cila rezultoi fituese me 10 vota, vendosi të mos e pranojë mandatin e deputetes, duke ia lënë sërish vendin Zegjinesë, e cila u bë e famëshme edhe për ngacmimet në rrjetet kundrejt rivalit demokrat, Gazment Bardhi. “Pasi ndoqa me vëmendje rinumërimin e votave për qarkun Fier, ndihem e lumtur dhe e nderuar që kontributi im i gjatë në Partinë Socialiste është vlerësuar nga bashkëqytetarët e mi. Megjithatë, unë kam marrë një vendim të rëndësishëm, që kam dëshirë ta ndaj me të gjithë, një vendim që e kam marrë përpara se të niste rinumërimi dhe që sot m’u përforcua përfundimisht. Do t’i lë me shumë kënaqësi vendin tim, koleges dhe mikes time, Zegjine Çaushi, Zegjinesë që ka luftuar ndoshta më shumë për skuadrën se sa për veten këtë fushatë, duke u vënë në shënjestër të sulmeve të pamerituara nga politika e vjetër” Zegjine Çaushi fitoi mandatin pas numërimit të zgjedhjeve të 11 majit, por iu hoqën 48 vota të përfituara padrejtësisht më 11 Maj, ndërsa rivales së saj, Maldrita Bardho, iu shtuan 26 vota.