Një grup kriminal që merrej me trafikun e lëndëve narkotike u shkatërrua nga policia italiane. Grupi përbëhej nga shqiptarë dhe italianë, ndërsa në total u lëshuan 19 urdhër arreste nga prokuroria e Padovës dhe Venecias. Gjatë aksionit të koduar “Puzzle 2020” u sekuestruan mbi 420 kilogramë drogë, vlera e të cilës shkonte në 34 milionë euro, mallra të ndryshëm dhe para cash. Operacioni u shtri edhe në Shqipëri, ku u ndaluan 3 persona si dhe në Gjermani. Sipas policisë shqiptare, në pranga përfundoi Ardian Korriku, 54 vjeç, Jurgen Korriku, 27 vjeç dhe Etleva Adami 46 vjeçe. Të gjithë akuzohen për trafikim të lëndëve narkotike. Grupi kriminal transportonte drogë në Itali nga Holanda, duke përdorur si rrugë Gjermaninë dhe Shqipërinë, dhe më pas e shisnin në qytete të ndryshme. Hetimet nisën tre vite më parë, pas kapjes së një shqiptari dhe një gruaje italiane të cilët po transportonin me një makinë 2 kilogramë heroinë. Pas zbërthimit të telefonatave, të dy të ndaluarve prokuroria italiane arriti të identifikonte dhe personat e tjerë të përfshirë në këtë veprimtari kriminale, duke prangosur dhe 17 korrierë që bënin transportin e drogës. Ndërkohë numri I personave të vendosur nën hetim deri më tani, sipas mediave italiane është 65. Sipas prokurorisë italiane, në krye të organizatës kriminale dyshohet se ishte një shqiptar që jetonte në zonën Ponte di Piave.