Presidenti i Shteteve të Bashkuara të Amerikës, Donald Trump, ka vendosur të zgjasë emergjencën kombëtare në lidhje me Ballkanin Perëndimor. Në njoftimin e publikuar nga Shtëpia e Bardhë, theksohet se emergjenca në rajonin tonë do të vijojë edhe përgjatë vitit të ardhshëm, deri më 26 qershor të vitit 2027. Kjo emergjencë ishte shpallur për herë të parë me urdhër ekzekutiv më 2001, por sipas njoftimit të Shtëpisë së Bardhë, të publikuar në Regjistrin Federal më 24 qershor, ajo do të zgjatet edhe përtej 26 qershorit të këtij viti, për shkak të gjendjes në Ballkanin Perëndimor. “Veprimet e personave që kërcënojnë paqen dhe përpjekjet ndërkombëtare për stabilizim në Ballkanin Perëndimor dhe gjendja e tanishme në këtë rajon paraqesin një kërcënim të pazakontë dhe të jashtëzakonshëm për sigurinë kombëtare dhe politikën e jashtme të Shteteve të Bashkuara. Për këtë arsye, emergjenca kombëtare e shpallur me urdhër ekzekutiv lidhur me Ballkanin Perëndimor, duhet të vazhdojë përtej qershorit 2026”. Zgjatja e këtij urdhri ekzekutiv nga Presidenti Trump mban në fuqi regjimin e sanksioneve dhe masave ndëshkuese ndaj individëve, grupeve dhe organizatave që konsiderohen se minojnë paqen, stabilitetin, marrëveshjet e pasluftës dhe institucionet demokratike në Shqipëri dhe pesë vendet e tjera të rajonit. Shtëpia e Bardhë vlerëson se veprimet destabilizuese, dhuna ekstremiste, korrupsioni dhe përpjekjet për të shmangur sanksionet amerikane vazhdojnë të përbëjnë kërcënim për stabilitetin rajonal dhe interesat e Shteteve të Bashkuara. Urdhri ekzekutiv për gjendjen në Ballkanin Perëndimor u miratua për herë të parë më 26 qershor 2001, nga ish-presidenti George W. Bush, pas luftërave në këtë rajon. Më pas, më 2021, presidenti i SHBA-së në atë kohë, Joe Biden, zgjeroi fushëveprimin e kësaj emergjence kombëtare, me argumentin se vendet e ish-Jugosllavisë dhe Shqipëria ishin përballur, gjatë dy dekadave të fundit, me korrupsion dhe veprime që pengonin marrëveshjet e arritura pas luftës.