Kryetarja e Kuvendit, Elisa Spiropali, u surpriza mbrëmjen e kësaj të shtune në iftarin e organizuar nga Kryegjyshi Botëror i Bektashinjve, Haxhi Dede Baba Edmond Brahimaj, me rastin e muajit të Shenjtë të Ramazani. Spiropali ka sot ditëlindjen dhe Baba Edmond Brahimaj, duke zbuluar këtë fakt për të pranishmit dhe duke ofruar tortën e përgatitur me këtë rast, e uroi në emër të të gjithë të pranishmëve. “Në Iftarin që shtrojmë sot kemi edhe një gëzim tjetër, ditëlindjen e zonjës Spiropali. Prandaj edhe në emrin tuaj e uroj Kryetaren e Kuvendit në këtë ditë të shenjtë: Të bëhesh 100 vjeç, të jesh e ëmbël dhe të na nxjerrësh ligje të ëmbla.”, u shpreh Baba Mondi. Kryetarja e Kuvendit shprehu mirënjohjen për këtë surprizë, ndërsa uroi më shumë paqe e dashuri për të gjithë besimtarët. “Ju falenderoj me shumë përulësi për këtë surprizë, i dashur Baba Mondi. U uroj të gjithë besimtarëve, të gjithë atyre që agjërojnë, agjërim të lehtë e të pranuar. Uroj të kemi më shumë dashuri në zemrat tona, më shumë tolerancë, më shumë paqe dhe më shumë mirëkuptim”, u shpreh Spiropali. Iftari u shtrua në selinë e Shenjtë të Kryegjyshatës Botërore Bektashiane në Tiranë, ku kishte dhjetëra të pranishëm.