Një azil-kërkues, të cilit iu refuzua azili në Britani, do të paguhet 3000 paundë për të pranuar skemën e “azilantëve vullnetarë” që pranojnë te vendosen në kampin në Ruanda. Sipas The Sun, emigranti, identiteti dhe origjina e të cilit nuk është bërë publik, është nisur drejt Ruandas të hënën, pasi kishte humbur të gjitha të drejtat për të qëndruar në Britani. Ashtu sikurse u njoftua muajin që shkoi nga qeveria, emigrantëve, që nuk u pranohet kërkesat, do t’u ofrohen para për t’u vendosur në vendin e Afrikës lindore, raporton BBC. Skema e shpërblimit po përdoret për të gjithë ata që nuk kanë të drejtë të qëndrojnë në Britani ose që kanë kryer krime në vende të tjera. Laburistët në opozitë akuzojnë ministrat e qeverisë se janë të dëshpëruar të bëjnë planin e Ruandës të funksionojë, para zgjedhjeve lokale në Angli, por që gjithsesi, nuk do të ndalojë gomonet. Yvette Cooper e quajti planin “lodër para-zgjedhore”, duke shtuar se taksapaguesit “po japin 3.000 paund për çdo vullnetar që i hipën avionit”. Sipas statistikave zyrtare 19,253 njerëz janë larguar nga Britania vitin që shkoi pasi nuk kishin më të drejta për të qëndruar. Shifra llogaritet se është shumë më e ulët nga numri i refugjatëve ilegalë që vijnë çdo muaj në Britani.