Më 15 tetor në Luksemburg, Shqipëria hap negociatat me BE për grup kapitullin e parë, që përfshin gjyqësorin, drejtësinë, funksionimin e institucioneve demokratike apo reformën e administratës. Puna do të nisë edhe për prokurimet publike, statistikat dhe kontrollin financiar. Të premten u publikua në faqen zyrtare të Këshillit te Europës axhenda e kësaj konference ku përfshihen: -Funksionimi i institucioneve demokratike -Reforma e administratës publike -Gjyqësori dhe të drejtat themelore -Drejtësia, liria dhe siguria -Kriteret ekonomike -Prokurimi publik -Statistikat -Kontrolli financiar Vendet e Bashkimi Evropian miratuan gjithashtu të premten axhendat e reformave të pesë vendeve të Ballkanit Perëndimor, të cilat i kanë paraqitur ato si kusht për të përfituar nga paketa e Planit të Rritjes, në vlerë prej 6 miliardë eurosh. Komisioni i IPA-s (Instrumentet e Para-Anëtarësimit) i BE-së dha pëlqimin për agjendat e reformave të Kosovës, Shqipërisë, Maqedonisë së Veriut, Malit të Zi, dhe Serbisë. I vetmi vend i rajonit, i cili duhet të presë ende miratimin e agjendës së tij, është Bosnje e Hercegovina, pasi dokumenti që ky vend e ka dërguar në BE, nuk ka qenë i kompletuar dhe nuk i ka adresuar të gjitha sugjerimet e dhëna nga Komisioni Europian.