E mërkura shënonte një tjetër valë fluturimesh evakuimi nga aeroporti i Kabul në Afganistan, teksa mbeten dhe një javë nga afati i fundit i evakuimeve të vendosur nga liderët e rinj talibanë në vend. Më shumë se 80,000 njerëz janë evakuar që prej 14 gushtit por shumë njerëz të dëshpëruar kërkojnë të largohen nga vendi me çdo mënyrë. Deri tani të paktën 20 persona kanë humbur jetën në tentativat për evakuim gjatë kaosit të aeroportit. Ne pamje shihet një nga tre avionë transporti dhe një aeroplan pasagjerësh të Forcave Ajrore Ruse u ulën sot në mëngjes në terminalin civil të Aeroportit “Hamid Karzai”. Bashkë me 4 avionët, mbërritën në Kabul edhe zyrtarët rusë që do të asistojnë dhe drejtojnë operacionet e evakuimit. Ministria ruse e Mbrojtjes njoftoi se 500 shtetas rusë, ukrainas, bjellorusë, taxhikë, kirgizë e uzbekë do të evakuohen nga Afganistani me 4 aeroplanë, me udhëzim të Presidentit Vladimir Putin.