Kokëulur dhe i penduar, u shfaq, këtë të shtunë, para Gjykatës Esmerald Balla, 30-vjeçari i akuzuar për vrasjen e babait të tij më 13 gusht të këtij viti në Shënavlash. Gjykata e Durrësit vendosi masën e sigurisë “arrest me burg” për Esmerald Ballën i akuzuar për vrasje për shkak të marrëdhënieve familjare dhe Edison Brahën, për dhënie ndihme në fshehjen e kufomës, moskallëzim krimi dhe pengim të zbulimit të së vërtetës. Gjatë seancës, e cila u zhvillua pa praninë e familjarëve të tyre, Balla nuk pranoi të japë shpjegime para gjyqtarit Rexhep Bekteshi, duke deklaruar vetëm se është i penduar. Avokatja e tij e mbrojti me argumentin se krimi është kryer në kushte të tronditjes së thellë psikike, për shkak të prishjes së kursimeve të familjes, me të cilat do të ndërtohej shtëpia e tij e re.