Një automjet i Shërbimit Sekret Amerikan u përfshi nga flakët në afërsi të Shtëpisë së Bardhë të hënën, vetëm pak orë përpara vizitës së planifikuar të kryeministrit izraelit Benjamin Netanyahu në Washington, raportoi Just the News. Incidenti ndodhi në kryqëzimin e Rrugës së 18-të me Avenue Pennsylvania – një nga rrugët më të njohura dhe të sigurta në kryeqytetin amerikan, që shtrihet përgjatë Shtëpisë së Bardhë. Sipas burimeve të para, sedilja e pasme e SUV-it të Shërbimit Sekret u përfshi nga flakët, por për fat të mirë nuk ka pasur raportime për persona të lënduar. Shërbimet e emergjencës mbërritën menjëherë në vendngjarje dhe arritën ta vendosin zjarrin nën kontroll në pak minuta. Autoritetet kanë nisur një hetim për të përcaktuar shkakun e zjarrit, megjithëse dyshohet se bëhet fjalë për një defekt teknik. Mbetet e paqartë nëse automjeti ishte pjesë e eskortës zyrtare të ndonjë personaliteti apo thjesht pjesë e flotës mbështetëse të sigurisë. Ngjarja shkaktoi mbyllje të përkohshme të disa rrugëve përreth Shtëpisë së Bardhë, duke shtuar tensionin në një ditë me nivel të lartë sigurie për shkak të vizitës së Netanyahu-t dhe takimeve të tij të rëndësishme me zyrtarë të lartë amerikanë. Kjo ndodhi vjen në një kohë kur masat e sigurisë në Uashington janë rritur ndjeshëm, për shkak të tensioneve ndërkombëtare dhe zhvillimeve të fundit në Lindjen e Mesme.