Të paktën tetë persona janë vrarë si pasojë e një sulmi ajror izraelit në një zonë të banuar në qytetin jugor të Libanit, Tyre. Sipas raportimeve për “Al Jazeera Arabic”, sulmi ka ndodhur menjëherë pasi ushtria izraelite lëshoi urdhra evakuimi për qytetin dhe zonat përreth. Autoritetet lokale bëjnë me dije se ekipet e mbrojtjes civile janë angazhuar në evakuimin e banorëve, përfshirë të moshuar, ndërsa shumë qytetarë janë larguar me nxitim nga zonat e rrezikuara. Urdhri i evakuimit përfshinte edhe një lagje të banuar nga komuniteti i krishterë, e cila më parë nuk ishte përfshirë në paralajmërimet e ushtrisë izraelite. Nga ana e saj, ushtria izraelite ka deklaruar se në atë zonë po operojnë luftëtarë të Hezbollahut, duke justifikuar veprimet ushtarake. Sulme të reja izraelite janë raportuar mëngjesin e kësaj të marte në jug të Libanit, pavarësisht paralajmërimit të bërë nga Irani për ndalimin e operacioneve ushtarake. Deri më tani, Forcat Mbrojtëse të Izraelit (IDF) nuk kanë bërë asnjë koment zyrtar lidhur me raportimet. Një ditë më parë, Irani deklaroi se kishte pezulluar operacionet ushtarake kundër Izraelit, por paralajmëroi se do t’i rifillonte ato nëse sulmet izraelite vazhdonin, përfshirë edhe në Libanin jugor.