20-vjeçari Thomas Matthew Crooks ishte vetëm 120 metra larg ish-presidentit Donald Trump, kur qëlloi me armë zjarri drejt tij, teksa ai po mbante fjalimin në një tubim elektoral në Pensilvani. Sipas dëshmitarëve, por edhe fotove që qarkullojnë në rrjete sociale, autori është zvarritur në çati, aty ku ka kryer atentatin që la të lënduar në veshin e djathtë Trumpin. Viktimë e sulmit mbeti një spektator, ndërsa dy të tjerë u plagosën. Pas incidentit 20-vjeçari u qëllua nga forcat e shërbimit sekret, duke e lënë pa shenja jete në vendngjarje. Sipas njoftimeve të mediave vendase kjo ngjarje mund të intensifikojë dhe komplikojë më tej garën presidenciale. Trump tani ka dalë nga spitali dhe është kthyer në shtëpinë e tij në New Jeresy. Ai falënderoi Shërbimin Sekret dhe forcat e zbatimit të ligjit për punën e tyre, që nga disa të tjerë u cilësua si dështim ruajta e ish-presidentit.