Një 20-vjeçar nga Kosova ka mbetur i vrarë të dielën në një sulm me armë zjarri, në Suedi. Viktima është identifikuar si Gent (Milot) Maksutaj, nga fshati Banjë i Istogut. Sipas mediave suedeze, vrasja dyshohet të ketë qenë një ekzekutim i planifikuar. Mediat suedeze bëjnë me dije se autori i dyshuar ka lëvizur me biçikletë dhe e ka qëlluar fillimisht viktimën. Pasi 20-vjeçari ka rënë në tokë, ai dyshohet se është afruar dhe ka qëlluar sërish. Pas krimit, i dyshuari raportohet se është larguar me tren drejt Stokholmit, ku më pas është arrestuar nga policia. Prokuroria suedeze ka bërë të ditur se në lidhje me ngjarjen është ndaluar një person nën moshën 18 vjeç. Megjithatë, hetuesit nuk përjashtojnë mundësinë që në vrasje të jenë përfshirë edhe persona të tjerë. Ngjarja ndodhi mbrëmjen e së dielës, pasi policia mori njoftim për të shtëna me armë rreth orës 21:00. Autoritetet suedeze vijojnë hetimet për të zbardhur motivin e krimit dhe nuk kanë konfirmuar ende nëse vrasja lidhet me grupet e krimit të organizuar. Familjarët e viktimës kanë reaguar pas ngjarjes së rëndë, duke bërë të ditur se Gent Maksutaj ishte nga fshati Banjë i Istogut. Përmes një postimi në rrjetet sociale, Tahir Maksutaj ka shkruar se Genti ishte një kalimtar i rastit dhe se “jetën ia morën bandat kriminale”. Ndërkohë, autoritetet suedeze po vijojnë hetimet për zbardhjen e plotë të rrethanave të vrasjes. Policia po analizon pamjet e kamerave të sigurisë dhe po merr në pyetje dëshmitarët okularë për të hedhur dritë mbi autorët dhe motivin e sulmit. Deri tani, hetuesit nuk kanë konfirmuar nëse ngjarja ka lidhje me grupet e krimit të organizuar, ndërsa hetimet mbeten të hapura për identifikimin e të gjithë personave të përfshirë.