Mbrëmjen e së mërkurës, dy persona kanë mbetur të vdekur pas të shtënave me armë zjarri në sheshin “Mujë Krasniqi” të qytetit të Klinës. Një person rreth 21-vjecar dyshohet se ka shtënë deri në pesë herë në drejtim të dy personave, njëri prej tyre ka mbetur i vdekur në vendin e ngjarjes ndërkohë që personi i dytë ka vdekur si pasojë e plagëve të marra rrugës për në Spitalin Rajonal të Pejës. I dyshuari më pas është larguar nga vendi i ngjarjes, megjithatë Policia e Kosovës ka bërë të ditur se ka arritur ta arrestojë. Policia ka njoftuar po ashtu se viktimat janë rreth 20-vjecar dhe familjar. “Kur kemi arrit në vend ngjarje kemi gjetur viktimën aty dhe i dyshuari vetëm se kishe ikur. Si pasojë e kësaj kemi një person pa shenja jete dhe një tjetër i cili rrugës për në spitalin Rajonal të Pejës ka vdekur pasi nuk ka mundur që ti përballojë plagët. Policia ka arritur me arrestu personin e dyshuar. Mosha e viktimave sipas informacioneve 19-20 dhe 21-22 vjeçar”, ka thënë Shaban Shala, drejtor në Policinë Rajonale të Pejës. Prokurorja e rastit, Sahide Gashi nga vendi i ngjarjes ka thënë se ende është herët për të konstatuar mbi motivin që çoi deri te vrasja. “Jemi në vazhdimësi të mbledhjes së provave-ekzaminimit të vendit të ngjarjes. Trupat e pajetë është urdhri që të dërgohen për autopsi në IML në Prishtinë”, ka thënë Gashi.