Gjykata e Posaçme shpalli vendimin për anëtarët e grupit kriminal që akuzohen për atentatin ndaj ish-prokurorit Arjan Ndoja dhe Aleksandër Lahos, i njohur si “Rrumi i Shijakut”, ku u vra Andi Maloku. Ramazan Rraja, nipi i ish-deputetit socialist Rrahman Rraja, është dënuar me 6 vite heqje lirie. Genti Ndërjaku është dënuar me 5.4 vite, Bashkim Haxhia me 4.8 vite, Endrit Sinani me 4.8 vite dhe Julian Pjetri me 4.4 vite. SPAK kishte kërkuar dënimin me 43 vite në total për 5 anëtarët e grupit kriminal që siguruan kushte e mjete për të kryer atentatin, por që dënimi konvertohej me zbritjen e 1/3 së tij për shkak të gjykimit të shkurtuar. Sipas Prokurorisë së Posaçme këta shtetas nga gushti i vitit 2019 nisën ndjekjen e Ndojt dhe Lahos dhe siguruan armët dhe mjetet për të kryer vrasjen. Më 11 nëntor 2019 në autostradën Tiranë-Durrës në afërsi të Mbikalimit të Shkozetit u krye atentat me armë zjarri në drejtim të automjetit në të cilin udhëtonin prokurori Arian Ndoja, Aleksander Laho dhe shoferi Andi Maloku. Si pasojë e të shtënave u plagosën Arian Ndoja dhe Aleksander Laho, ndërsa Andi Maloku mbeti i vdekur. Për këtë ngjarje është dënuar me burg përjetë Redjan Rraja, nipi tjetër i ish-deputetit socialist Rrahman Rraja dhe me 35 vite burg Arjol Halilaj.