Vlora tronditet sërish nga një ngjarje kriminale. Të hënën në mbrëmje, rreth orës 18.15 minuta përgjatë autostradës Fier - Vlorë në afërsi të fshatit Novoselë është ekzekutuar me armë zjarri tip pistoletë 30 vjecari Kristjan Marku nga Rësheni. 30 vjeçari po udhëtonte nga Fieri në Vlorë me makinën e tij tip “Passat” me targa AB 107 PN, ndërkohë që paralel me të nga krahu i djathtë i pasagjerit është afruar një makinë tip Golf, ku autori ka qëlluar drejt Markut disa herë me pistoletë në ecje e sipër. 30 vjeçari ka marrë dy plumba në trup dhe makina e tij ka ecur për inerci rreth 400 m nga vendi ku është qëlluar. Nuk dihet nëse Marku ndërroi jetë në momentin që është qëlluar apo kur makina e tij u përplas me trafikndarësen. Është njoftuar policia dhe ambulanca të cilët e kanë gjetur Markun pa jetë. Policia ka mbledhur 10 gëzhojat në vendngjarje ndërsa pas pak minutash makina tip Golf e atentatorëve është gjetur e djegur 1 km nga vendi i krimit. Uniformat blu kanë ushtruar kontrolle në fshatrat përreth Novoselës dhe Panajasë dhe në hyrje të Vlorës është ngritur postobllok. Janë marrë gjithashtu pamjet nga kamerat e karburantit aty pranë dhe ato përgjatë autostradës në Vlorë. Shtetasi Kristjan Marku, alias Kristi Bardhi, i cili u qëllua për vdekje rezulton me precedent penalë. Ai dyshohet të jetë autor në ngjarjen e datës 26 mars të vitit 2023, të ndodhur në Rrëshen të Mirditës, ku pati të shtëna me armë zjarri në drejtim të shtetasit Saimir Reçi. Marku akuzohej për “Vrasje me dashje në bashkëpunim mbetur në tentativë”. Ai është nipi i Martin Bardhit të vrarë në Rrëshen në shtator të vitit 2023 dhe pista kryesore ku po heton policia është hakmarrja. Kristjan Marku është personi i tretë i vrarë në janarin e këtij viti pas Ramazan Matjas më 5 janar dhe Bujar Nasufit më 12 janar.