Rreth 30 herë është qëlluar me arme zjarri mbrëmjen e së premtes, ndaj një automjeti tip “Audi” i blinduar. Ngjarja ka ndodhur në fshatin Rranxa, në Bushat të Vau Dejës. Fatmirësisht nuk ka viktima teksa ende nuk dihen autorët. Dyshohet se kanë qenë dy persona, në një automjet tjetër, të cilët sapo i janë afruar mjetit të blinduar kanë hapur breshëri duke qëlluar disa herë. Në vendin e ngjarjes policia e Shkodrës ka gjetur rreth 30 gëzhoja, të cilat i përkasin dy armëve të ndryshme. Në fillim është dyshuar për shkëmbim zjarri. Ndërkohë në vendin e ngjarjes nuk është gjetur as drejtuesi i mjetit “Audi”. Gjatë gjithë atentatit ndaj tij, ai ka qëndruar brenda në automjet ndërsa pasi janë larguar autorët është arratisur nga vendi i ngjarjes. Mjeti i blindua, është me targa gjermane. Policia e Shkodrës po punon per identifikimin e autoreve ndërsa nuk dihet ende as kush ka qenë objektiv i atentatit Policia ka bërë identifikim e një personi të përfshirë në këtë ngjarje, por emri nuk bëhet i ditur për shkak të hetimeve. Situata në Shkodër javën e fundit është shoqëruar me ngjarje të rënda, ku katër ditë më parë në Velipojë u vranë dy persona për shkak të një konflikti të vjetër.