Top Channel/ Assange s’do ekstradohet menjëherë në SHBA, gruaja: Gjykatat të mos pranonin çështjen

Gjykata e Lartë e Londrës vendosi se Julian Assange nuk mund të ekstradohet menjëherë në Shtetet e Bashkuara lidhur me akuzat për spiunazh. Vendimi paraqet një fitore të pjesshme për themeluesin e Wikileaks. Dy gjyqtarët e kësaj gjykate thanë se atij do t’i lejohej një tjetër proces apeli kundër ekstradimit nëse nuk jepeshin garanci nga Shtetet e Bashkuara se ai nuk do të përballet me dënim me vdekje. Vendimi nënkupton se beteja e tij ligjore, thuajse 10 vjeçare, do të vazhdojë dhe se zoti Assange do të vazhdojë të mbetet në burgun e sigurisë së lartë të Londrës “Belmarsh”, ku po mbahet prej 5 vjetësh. "Julian është një i burgosur politik", tha gruaja e tij Stella Assange, pas seancës. Sipas saj, gjykatat britanike duhet të kishin refuzuar padinë e ngritur kundër themeluesit të rrjetit WikiLeaks sepse diçka e tillë ‘kriminalizon gazetarinë.’ Prokurorët amerikanë synojnë që 52 vjeçari të gjykohet për 18 akuza, të mbështetura tek Akti i Spiunazhit, lidhur me publikimin e dokumenteve sekrete diplomatike dhe të ushtrisë amerikane, në faqen e tij të internetit, Wikileaks. Gjykata u ka kërkuar autoriteteve amerikane të japin “garanci të pranueshme” se zoti Assange do të ketë mundësi të mbrohet bazuar në Amendamentin e Parë të Kushtetutës Amerikane, që garanton lirinë e shprehjes dhe të shtypit dhe se ndaj tij nuk do të kërkohet dënimi me vdekje. Nëse nuk jepen këto garanci, atëherë Assange do t’i mundësohej e drejta e apelit. Një seancë tjetër dëgjimore është caktuar të mbahet në 20 maj. Mbështetësit e zotit Assange e shohin atë si një hero i cili po hetohet, pasi zbuloi abuzimet e qeverisë amerikane. Avokatët e tij thonë se ai mund të përballet me 175 vjet burg nëse gjendet fajtor, megjithëse autoritetet amerikane kanë thënë se dënimi ka të ngjarë të jetë shumë më i shkurtër se kaq.