Presidenti i rrëzuar Bashar al-Assad ka thyer heshtjen për herë të parë pas arratisjes nga Siria. Ai pretendon se nuk kishte në plan të largohej nga vendi pas rënies së Damaskut një javë më parë, por ushtria ruse e evakuoi atë pasi baza e tyre në Sirinë perëndimore u sulmua. Këto janë komentet e para të Assadit që kur ai u rrëzua nga grupet kryengritëse, një javë më parë. Assad ka thënë në një deklaratë në faqen e tij në Facebook se u largua nga Damasku në mëngjesin e 8 dhjetorit, disa orë pasi kryengritësit sulmuan kryeqytetin. Ai ka shtuar se është larguar në koordinim me aleatët rusë në bazën ruse në provincën bregdetare të Latakias, ku ai planifikoi të vazhdonte luftimet. "Në asnjë moment gjatë këtyre ngjarjeve nuk kam menduar të tërhiqem apo të kërkoja strehim, as nuk është bërë një propozim i tillë nga ndonjë individ apo palë. Kur shteti bie në duart e terrorizmit dhe humbet aftësia për të dhënë një kontribut domethënës, çdo pozicion bëhet i pavlefshëm", thuhet në deklaratën e tij. Sipas Al Assad, pasi baza ruse u sulmua nga dronët, rusët vendosën ta transferojnë atë natën e 8 dhjetorit për në Rusi.