Asnjë person i vaksinuar në Mbretërinë e Bashkuar nuk ka ndërruar jetë prej infektimit nga variant Indian i koronavirusit, thonë shkencëtaret vendas, sipas të cilëve vaksinat janë 97% efikase edhe ndaj këtij mutacioni të rrezikshëm. Kërkimet e realizuara mbi punonjësit shëndetësorë në Indi treguan se ata që kanë marrë një dozë të AstraZenecas kishin mbrojtje shumë të lartë ndaj variantit i cili ka mbjellë kudo shqetësim, ndërsa rreziku i shtrimit në spital reduktohej në vetëm 0.06 per cent. Në Angli janë regjistruar 1,313 raste me variantin Indian, por qeveria britanike thotë se të dhënat që ajo disponon, tregojnë se nuk ka pasur asnjë jetë të humbur prej tij ne mesin e personave të vaksinuar. Në Indi së fundi, rastet e reja duket se po pësojnë rënie sipas Associated Press. Javën e fundit, ato u tkurren me gati 70% në kryeqendrën financiare të vendit, Mumbain me 22 milionë banorë. Nga 11 mijë infektime në ditë që numëronte ky qytet, tani ka më pak se 2000. Edhe pse shifra të tilla ofrojnë një rreze shprese, autoritetet sërish paralajmërojnë se per kujdes, sepse virusi nuk është larguar dhe kriza nuk ka marrë fund.