Kandidatja demokrate për presidente, Kamala Harris vuri në pikëpyetje qëndrueshmërinë fizike të kandidatit republikan, Donald Trump për të shërbyer si i pari i shtetit amerikan, teksa mbanin mitingje në Michigan. Harris shprehu dyshimet për Trump, pasi sipas saj mosha 78-vjeçare e rivalit është problem. Të njëjtën gjë ka bërë edhe Trump me Joe Biden, përpara se 81-vjeçari të tërhiqej nga gara, pasi republikani e konsideronte si problematike moshën e presidentit. Kandidatja për të marrë nën drejtim Shtëpinë e Bardhë deklaroi se ish-presidenti amerikan po anashkalonte intervistat sepse ishte i lodhur. “Kjo duhet të jetë një shqetësim. Nëse ai nuk mund të përballojë ashpërsinë e fushatës, a është ai i përshtatshëm për këtë punë?”, tha Harris gjatë një mitingu. Pas arritjes në Detroit, Trump iu kundërpërgjigj rivales së tij, duke hedhur poshtë këto pretendime. “Nuk pushova për 48 ditë. Unë as nuk jam i lodhur. Jam shumë i emocionuar. E dini pse? Ne kryesojmë në sondazhe sepse populli amerikan nuk e dëshiron atë”, deklaroi Trump. Sipas sondazheve parazgjedhore në shtetet “e luhatshme”, në fakt ato janë të barabarta dhe deri në zgjedhje kanë mbetur vetëm 18 ditë.