Një ngjarje e rëndë ka tronditur pasditen e sotme qytetin e Korçës, ku një 72-vjeçar ka humbur jetën si pasojë e një zjarri që përfshiu banesën e tij. Ngjarja ka ndodhur rreth orës 15:45, në katin e parë të një pallati. Ndërsa flakët kanë alarmuar banorët e zonës, policia dhe zjarrfikëset kanë ndërhyrë me shpejtësi për të evakuuar qytetarët e tjerë. Brenda në banesë ndodhej 72-vjeçari Urim Hysolli, i cili fatkeqësisht nuk ka mundur t'u mbijetojë gazeve toksike dhe ka ndërruar jetë si pasojë e asfiksisë. Mësohet se në këtë apartament jetonte me qira një çift, por rreth dy muaj më parë, pronari Urim Hysolli ishte rikthyer dhe u kishte kërkuar atyre të lironin banesën. Derisa qiramarrësit të gjenin një strehë të re, ata kishin rënë dakord që 72-vjeçari të jetonte përkohësisht në njërën prej dhomave. Sipas fqinjëve, i moshuari vuante nga varësia ndaj alkoolit dhe kjo nuk ishte hera e parë që rrezikohej jeta e banorëve. Vetëm dy ditë më parë, nën efektin e alkoolit, ai kishte tentuar të ndizte një zjarr brenda në shtëpi, i cili fatmirësisht u izolua në kohë pa marrë përmasa. Sot, rrethanat rezultuan fatale.