Një moment i tensionuar u shënua gjatë deklaratave për mediat në Uashington, ku presidenti amerikan Donald Trump u përplas me ambasadorin e Australisë në SHBA, Kevin Rudd, gjatë vizitës së kryeministrit australian Tony Albanese. Gjatë takimit, një gazetar australian e pyeti Trumpin nëse kishte shqetësime për qeverinë e Albanese, duke iu referuar komenteve kritike që Rudd kishte bërë në të kaluarën për të, kur shërbente si ish-kryeministër i Australisë. Trump u përgjigj me një ton të ftohtë: “Nuk di asgjë për të,” – tha ai, ndoshta pa e kuptuar se Rudd ndodhej në të njëjtën dhomë. Më pas, Trump pyeti nëse Rudd vazhdonte ende të punonte për qeverinë australiane. Ambasadori iu përgjigj qetësisht se komentet që kishte bërë ndaj tij datonin përpara se të merrte detyrën si ambasador. Replika e Trumpit erdhi menjëherë: “As mua nuk më pëlqen dhe ndoshta nuk do të më pëlqesh kurrë.” Komentet e Rudd ndaj Trumpit datojnë nga viti 2020, kur ai e kishte quajtur në rrjetet sociale “presidentin më shkatërrues në histori”. Postimet u fshinë më vonë, por duket se kanë lënë ende gjurmë në marrëdhënien mes dy figurave politike. Incidenti ka tërhequr vëmendje të madhe në media, duke nënvizuar tensionet që ende ekzistojnë në raportet mes Trumpit dhe disa përfaqësuesve të vendeve aleate, përfshirë Australinë.