Pas pesë raunde negociatash dhe pesë ditësh bisedimesh intensive në Uashington, Izraeli dhe Libani kanë arritur një marrëveshje, e cila synon të krijojë bazat për uljen e tensioneve mes dy vendeve. Megjithatë, zhvillimet në terren tregojnë se rruga drejt stabilitetit mbetet e vështirë. Vetëm pak orë para njoftimit për marrëveshjen, ushtria izraelite kreu dy sulme ajrore, një nga qytetet kryesore në jug të Libanit. Nga ana tjetër, Hezbollahu vazhdon të kërkojë largimin e plotë të forcave izraelite nga jugu i vendit, duke kundërshtuar çdo zgjidhje që nuk parashikon tërheqjen e tyre. Sekretari amerikan i Shtetit, Marco Rubio, e cilësoi marrëveshjen si “vetëm fillimin” e një procesi më të gjerë diplomatik. Mbështetje për këtë zhvillim shprehu edhe Italia, e cila përmes një deklarate të qeverisë theksoi se do të vazhdojë të kontribuojë në përpjekjet ndërkombëtare për stabilizimin e rajonit. Edhe deklaratat e kryeministrit izraelit Benjamin Netanyahu lënë të kuptohet se situata në terren nuk do të ndryshojë menjëherë. Ai bëri të qartë se ushtria izraelite do të vazhdojë të qëndrojë në atë që e cilësoi si “zonë sigurie” në jug të Libanit.