Është arrestuar në Sarandë 30-vjeçari Mariglen Kondi, i shpallur në kërkim për tentativën e rrëmbimit të një shtetaseje nga Nepali pranë pikës kufitare të Qafë Botës. Operacioni i Policisë u zhvillua mesditën e kësaj të hëne në lagjen nr. 4 të Sarandës, pranë stadiumit të qytetit, ku u bë e mundur kapja e të riut nga fshati Salari i Tepelenës. Ngjarja për të cilën ai akuzohet ka ndodhur më 2 korrik, rreth orës 18:53, në aksin Konispol–Qafë Botë, në vendin e quajtur “Postbllok”. Sipas hetimeve, 30-vjeçari ka tentuar disa herë të fusë me forcë në automjet një të re nga Nepali. Ajo ka mundur të largohet me vrap dhe më pas ka kallëzuar ngjarjen në polici. Fale veprimeve hetimore dhe pamjeve të siguruara, efektivët identifikuan autorin e dyshuar dhe Gjykata caktoi ndaj tij masën e sigurisë “Arrest në burg” për veprën penale “Heqja e paligjshme e lirisë”, mbetur në tentativë. Mariglen Kondi rezulton person me precedentë penalë. Në vitin 2020 ai është arrestuar për kultivim të bimëve narkotike në bashkëpunim, ndërsa më pas përfitoi masën “Arrest në shtëpi”. Sipas të dhënave policore, ai e theu këtë masë sigurimi dhe në vitin 2021 u arrestua sërish, i dyshuar për vjedhjen e disa automjeteve tip kamionçinë në Lushnjë.30-vjeçari pritet të dalë përpara gjykatës për vlerësimin e masës së sigurisë.