Midis personave të arrestuar mes dyshimeve për korrupsion në Parlamentin Evropian është edhe eurodeputetja greke e Pasok-ut dhe zv/presidente e PE, Eva Kaili. Ajo po hetohej si e dyshuar për një çështje të madhe korrupsioni lidhur me Botërorin e Katarit 2022 dhe siç theksojnë mediat belge e vetmja mënyrë për të arrestuar një eurodeputet që mbrohet nga imuniteti i tij është të arrestohet në flagrancë. Sipas të njëjtave burime zyrtarët e Katarit ishin përpjekur të korruptonin një eurodeputet socialist italian, i cili ishte anëtar i Parlamentit Evropian nga viti 2004 deri në 2019. Hetuesit belgë "dyshonin se një vend i Gjirit po ndikonte në vendimet financiare dhe politike të Parlamentit Evropian duke paguar shuma të konsiderueshme parash ose duke ofruar dhurata të rëndësishme palëve të treta me një pozicion politik ose një pozicion të rëndësishëm strategjik" brenda këtij organi. Kontrollet e policisë belge janë kryer në 16 shtëpi dhe janë konfiskuar edhe 600000 euro. Më pas zyra e prokurorit publik të Belgjikës njoftoi se katër persona, duke përfshirë një ish-deputet, ishin arrestuar si pjesë e një hetimi nga një gjykatës financiar. Tre të arrestuarit e tjerë janë Luca Visentini, Sekretar i Përgjithshëm i sapozgjedhur i Konfederatës Ndërkombëtare të Sindikatave, ish-deputeti Pier-Antonio Panzeri dhe Francesco Giorgi bashkëshorti italian i eurodeputetes Kaili. Me njëherë pas kësaj kreu i Pasok-ut Nikos Androulakis, njëkohësisht edhe ai eurodeputet ka reaguar menjëherë dhe e ka përjashtuar atë nga radhët e partisës socialiste të Greqisë. Eva Kaili 44 vjeç, një nga 14 nënkryetaret e Parlamentit Evropian, ka qënë për disa vite prezantuese e lajmeve dhe gazetare, më pas anëtare e Pasok-ut dhe eurodeputete që nga viti 2014. Disa ditë më parë, ndërkohë që protestohej në gjithë Europën për punëtorët e vrarë në ndërtimin e stadiumeve të Katarit, Kaili kishte deklaruar se ky shtet ishte "pararojë në të drejtat e punës",duke shkaktuar reagime të mëdha. Pamjet: AFP