Ish-kryeministri I Pakistanit Imran Khan u arrestua nga policia për korrupsion. Ai u prangos gjatë momentit që u paraqit në një gjykatë të Islamabad ku do të gjykohej për një çështje tjetër. Arrestimi I ish-kryeministrit nga forcat e sigurisë u shoqërua me protesta të shumta. Mijëra mbështetës së tij, dolën në rrugët e shumë qyteteve dhe u përplasën me policinë. Protestuesit hodhën gurrë e sende të forta në drejtim të agjentëve, ndërsa këta të fundit u përgjigjën me gaz lotsjellës. Protestuesit kërkuan lirimin e ish-kryeministrit me argumentin se akuzat ndaj tij janë të sajuara. Imran Khan u rrëzua nga detyra vitin e kaluar gjatë një mocioni mosbesimi që u votua nga parlamenti. Edhe pse premtoi se do të rikthehet sërish në pushtet, ish numri një I qeverisë po përballet me një sërë çështjesh në gjykata, pasi akuzohet për një sërë veprash penale. Në nëntor të vitit të kaluar, 70-vjeçari I mbijetoi dhe një atentati me armë zjarri ku mbeti I plagosur në këmbë. Ai fajësoi për ngjarjen kryeministrin aktual Shehbaz Sharif dhe një oficer të lartë të ushtrisë. Khan në vitin 2018 mori detyrën, ku fitoi shumë popullaritet në radhët e votuesve, pasi premtoi luftë ndaj korrupsionit dhe zhvillim të ekonomisë për të ulur nivelin e varfërisë në vend. Ndërkohë gjatë drejtimit të vendit para se të rrëzohej nga qeveria, Khan pati marrëdhënie të acaruara me ushtrinë, që cilësohet si çelësi i pushtetit politik në Pakistan.