Njësia e reagimit të Shpejtë e Policisë së Kosovës ka arrestuar sot kryetarin e PSD-së dhe bashkëshortin e ish-ministres shqiptare të Arsimit, Dardan Molliqajn, teksa po zhvillonte takime me qytetarë në rrugë. PSD ka reaguar pas arrestimit në një postim në rrjetin social Facebook. Sipas Partisë Social-Demokrate, arrestimi i Molliqajt është totalisht i padrejtë dhe jashtë çdo racionaliteti. “Përderisa nuk ka marrë as ftesë nga gjykata dhe në të njëjtën kohë çdo ditë është në rutinën e tij dhe mund të gjendet lehtësisht, kjo sjellje nuk mund të lexohet ndryshe përveç se presion politik dhe demonstrim force nga një njësi e krijuar për situata emergjente dhe të rrezikshme, jo për të ndaluar opozitën politike”, thuhet në postim. Më pas në postim shkruhet se prioriteti dhe zelli në të cilin janë vendosur anëtarët e PSD-së për “shqyrtim rastesh” lë dyshime se kjo po ndodh qëllimisht, meqë një numër i madh rastesh e kanë së bashku me anëtarët e VV-së, duket që mësyrja është kryesisht ndaj PSD-së. “Arrestime të tilla nuk na ndalin, vetëm e bëjnë më të qartë për të gjithë kush ka frikë nga organizimi politik. Kërkojmë lirimin e menjëhershëm të Dardan Molliqajt”, përfundoi PSD në postim.