Delegacioni i Bashkimit Evropian në Tiranë reagon për arrestimin e kryebashkiakut të Tiranës, Erion Veliaj, me urdhër të SPAK. BE thekson se po ndjek nga afër zhvillimet e fundit në lidhje me hetimin ndaj kryebashkiakut, por nuk komenton mbi procedurat gjyqësore në vazhdim. “Reforma në sektorin e drejtësisë dhe forcimi i shtetit të së drejtës në Shqipëri janë elementë kyç në procesin e anëtarësimit në Bashkimin Evropian. BE-ja mbetet e përkushtuar maksimalisht për të mbështetur përpjekjet e Shqipërisë në ndjekjen e këtyre reformave dhe për ta ndihmuar vendin të konsolidojë efikasitetin, pavarësinë, llogaridhënien dhe profesionalizmin e institucioneve të saj, si dhe përputhshmërinë e tyre me standardet e BE-së, si në sektorin e zbatimit të ligjit, ashtu edhe në atë të drejtësisë”. Më tej, Delegacioni i BE-së në Tiranë vlerëson punën e SPAK, duke vënë theksin te pavarësia e institucionit për kryerjen e hetimeve. “Roli specifik i Strukturës së Posaçme kundër Korrupsionit dhe Krimit të Organizuar (SPAK) dhe pavarësia e saj në hetimin, ndjekjen penale dhe gjykimin e rasteve komplekse të korrupsionit, pa asnjë përpjekje për ndërhyrje politike apo presion të padrejtë, janë me rëndësi thelbësore për konsolidimin e shtetit të së drejtës në Shqipëri”.