Të përfundosh në burg vetëm për parakalimet me makinë. Të paktën, kjo është arsyeja që ka deklaruar para grupit hetimor Edison Tirana, 42-vjeçari që u dhunua dhe ndaj tij u qëllua me armë, mbrëmjen e së shtunës në aksin Shkodër – Hani i Hotit. Përplasja me dy vëllezërit Gjekaj, tashmë të arrestuar, nisi në doganë e më pas gjatë gjithë rrugës deri në Koplik. Në afërsi të Koplikut, nga makina e Gjovalin dhe Pëllumb Gjekajt, është qëlluar me armë zjarri disa herë ndaj automjetit me të cilin udhëtonte Edison Tirana. Ky i fundit u ka shpëtuar plumbave, por ka humbur kontrollin e mjetit dhe më pas është përplasur në një barrierë të një karburanti. Viktima e sulmit më pas ka dalë nga makina dhe ka tentuar të largohet, por dy vëllezërit Gjekaj, të ndihmuar edhe nga nipi i tyre, i identifikuar dhe i shpallur në kërkim, e kanë kapur 42-vjeçarin dhe e kanë dhunuar me sende të forta. Pas ngjarjes, i dhunuari është dërguar në Spitalin Rajonal të Shkodrës, ku ndodhet jashtë rrezikut për jetën. Policia më pas bëri të mundur arrestimin e dy vëllezërve Gjekaj, si dhe shpalli në kërkim edhe nipin e tyre, si bashkëpunëtor në ngjarje.