Për herë të dytë këtë muaj, administrata Biden anashkaloi Kongresin për të miratuar një shitje urgjente të armëve në Izrael në kohën kur shteti hebre vazhdon fushatën e tij të hakmarrjes kundër Hamasit në Gaza, pavarësisht kritikave ndërkombëtare në rritje. Departamenti i Shtetit njoftoi se Sekretari Antony Blinken kishte informuar Kongresin mbi marrjen e një vendimi të dytë urgjent që mbulonte një shitje prej 147.5 milionë dollarësh për pajisje ushtarake që nevojiten për të vënë në funksionim predhat 155 mm të blera më herët nga Izraeli. “Nisur nga urgjenca e nevojave të mbrojtjes së Izraelit, sekretari njoftoi Kongresin se ka ushtruar autoritetin e deleguar për të dalë në përfundimin se ekziston një emergjencë, për shkak të së cilës është i nevojshëm miratimi i menjëhershëm i transferimit (të paisjeve). Shtetet e Bashkuara janë të përkushtuara për sigurinë e Izraelit, dhe është jetike për interesat kombëtare të Shteteve të Bashkuara që Izraeli të jetë në gjendje të mbrohet nga rreziqet që i kanosen”, thuhet në deklaratën e DASH. Vendimi i emergjencës nënkupton se shitja e armatimit do të anashkalojë shqyrtimin që bëhet nga Kongresi për shitjet e armatimeve vendeve të tjera. Vendime të tilla janë të rralla, por jo të paprecedenta, kur administratat shohin një nevojë urgjente për dërgim armësh për të cilat nuk mund të pritet OK-i i ligjvënësve. Departamenti i Shtetit u përpoq të kundërshtonte kritikat e mundshme për shitjen e armatimit për arsye të të drejtave të njeriut duke thënë se ishte në kontakt të vazhdueshëm me Izraelin për të theksuar rëndësinë e minimizimit të viktimave në radhët e civilëve, të cilat janë rritur që kur Tel Avivi nisi kundërpërgjigjen ndaj sulmeve të Hamasit në 7 tetor.