Gjithnjë e më shumë qytetarë të Kosovës po pajisen me armë zjarri, qoftë për rekreacion, qoftë për siguri. Të dhënat e Ministrisë së Punëve të Brendshme në vend tregojnë se, vetëm gjatë vitit 2024, janë dhënë mbi 10 mijë leje të tilla. Arsyet që i çojnë qytetarët të armatosen, sipas saj, lidhen me pasionet e tyre për shenjëtari dhe gjah. Por, ekspertët e sigurisë mendojnë ndryshe - pasiguria publike, thonë ata, është ndër faktorët kryesorë. Kështu raporton Radio Kosova e Lirë. Me Ligjin për armët në Kosovë, çdo person që ka së paku 21 vjet, mund të kërkojë leje për t’u pajisur me armë. Aplikuesi duhet të posedojë aftësi psiko-fizike dhe të kalojë testin teorik dhe atë praktik për përdorimin e armës. Po ashtu, duhet të ketë arsye të besueshme përse ka nevojë për armë, si dhe të kaluar të pastër kriminale. Vlerësimin e bëjnë autoritetet përgjegjëse për fushën e caktuar. Në QKUK thonë se, brenda një jave, mbi 50 persona u nënshtrohen kontrolleve te psikologu dhe mjekë të ndryshëm, që të gjitha të nevojshme për të kërkuar lejen e armëmbajtjes. Numri i lejeve të dhëna ka ndryshuar ndër vite - më 2021 ka qenë 7.520, më 2022 ka qenë 7.125, më 2023 ka qenë 10.458 dhe deri në fillim të dhjetorit 2024 ka qenë 10.190.