Joe Biden qëndron sot në Arabinë Saudite, stacioni i fundit i vizitës së tij në Lindjen e Afërt. Përpara vizitës së tij, autoriteti i aviacionit civil i mbretërisë së Gjirit bëri të ditur në një mesazh në Twitter, se hapësira ajrore do të "hapet për të gjitha shoqëritë e fluturimit, që përmbushin kërkesat e autoriteteve për kalim tranzit". Kjo masë mundëson edhe fluturimin e avionëve nga Izraeli dhe u përshëndet nga presidenti Biden si "historike". Arabia Saudite ka deklaruar, se nuk do të ketë marrëdhënie zyrtare me shtetin hebre, për sa kohë nuk është zgjidhur konflikti mes tij dhe palestinezëve. Kjo do të jetë në vemendjen e Bidenit gjatë kësaj vizite, ku pritet të angazhohet për normalizimin e marrëdhënieve mes këtyre dy vendeve. Shefi i Shtëpisë së Bardhë duket se e ka dhe një mision tjetër: ai pritet ta nxisë mbretërinë saudite për rritjen e eksporteve të naftës. Cmimet e larta të karburanteve janë kudo temë dite e për këtë arsye, edhe Biden është nën presion në SHBA, e kjo katër muaj para zgjedhjeve të rëndësishme për kongresin. Por në një lëvizje që është përshkruar si fyese për presidentin amerikan, sauditët kanë importuar 647.000 tonë naftë përmes porteve ruse dhe estoneze nga prilli deri në qershor të këtij viti. Rusia po e shet naftën e saj në tregjet botërore me ulje të dukshme çmimi për shkak të sanksioneve të BE.Mbretëria saudite e përdor naftën e importuar për prodhimin e rrymës elektrike, dhe ndërkohë, mund të eksporttojë naftën e saj të papërpunuar.