Pamje dramatike nga kufiri mes Nepalit dhe Kinës, ku përmbytjet masive kanë vrarë të paktën tetë persona, ndërsa në Tibet raportohen pasoja të rënda dhe të zhdukur. Rrëketë e baltës kanë marrë përpara shtëpi, automjete dhe një ndërtesë të madhe pranë terminalit kufitar. Autoritetet paralajmërojnë për një valë të dytë. Një mur uji dhe balte ka përfshirë luginat malore të Nepalit verior, pranë kufirit me Kinën, duke shkatërruar gjithçka në rrugën e tij. Pamjet e televizionit shtetëror kinez CCTV nga pika kufitare Gyirong tregojnë rrjedhën e furishme që merr përpara një godinë të madhe të kompleksit kufitar, e ngjashme me një terminal. Uji transporton degë pemësh dhe mbetje, ndërsa rrugët zhduken nën baltë. Policia nepaleze njoftoi se janë gjetur tetë trupa dhe operacionet e kërkim-shpëtimit vijojnë. Një dëshmitar tha se pa ujin të merrte përpara tetë ose nëntë kamionë, së bashku me banesa dhe njerëz. Ushtria ka dërguar helikopterë dhe ekipe të emergjencave. Janë dëmtuar edhe impiante energjetike me kapacitet rreth 430 megavat, duke shkaktuar ndërprerje të furnizimit me energji. Sipas ekspertëve, një ortek shkëmbinjsh dhe akulli mund të ketë bllokuar lumin Lhende dhe të ketë shkaktuar vërshimin. Një masë bllokuese mbetet ende në rrjedhën e sipërme, ndaj autoritetet paralajmërojnë se një përmbytje e dytë mund të jetë e afërt.